يا خوفى عليكى يا مصر

يا ريت بس تسمعوا كلامى بعد كده

وأنا كان مالى ومال كل اللى بيحصل ده

ليه مفيش حاجة تمشى صح من الأول ولا إحنا غاويين عك كل اللى يعرفونى عارفين إنى طول عمرى وأنا بأسب وألعن فى الحكام والنظام وعمرى ما قلت عليهم ولا على وضع البلد كلمة حلوة وعمرى ما كانت حاجة عجبانى وكان رأيهم فى إنى متشائم وعيل معقد وكانوا يقولولى خليك إيجابى ما تكونش سلبى وحاول إنك تلاقى طريق " أنت كويس يا حازم بس دماغك دى هى اللى مودياك فى داهية " طب وأنا أعمل ايه يعنى وأنا أصلا مشكلتى فى دماغى ؟ مشكلتى إنى فاهم, حاجة عاملة كدة زى تهمة سيدنا لوط لما قومه قالوا :" أخرجوا آل لوط من قريتكم إنهم أناس يتطهرون "

شوف يا أخى الطهارة تهمة ! أهو أنا كنت زى كده بالظبط وكانوا عايزينى أكون زيهم

ولا واحد يعملك فيها مخلص أمين يقولك " يا ابنى الحيطان ليها ودان وأنا لي واحد قريبى فى أمن الدولة قالى إن اسمك عندهم " قال يعنى الواد مهم وبيعرف ناس فى أمن الدولة حاجة تفقع , ما هو يا عم أنت هى فين الدولة دى ؟ البلد دى كلها كانت بتدار بمنطق القبيلة

أنا فاكر فى مرة قريت خبر عن المية فى فنلندا باين ولا ايه مش فاكر بيقولك إن المية اللى نازلة من الحنفية عندهم لقيوها أنقى من المية المعدنية بعدها على طول طلع إن المية المعدنية اللى عندنا أصلا دى مية ترع !عادى يعنى ! طبيعى ماهى المية بتاعت الحنفية عندنا هى أصلا مية مجارى يبقى منطقى إن المية المعدنية تكون مية خزانات وترع إيه المشكلة !

ولا لما كنت احكى عن وأقول عن التعليم بره إزاى وعندنا إزاى يقولك إيش جاب لجاب ولا لما اجيب سيرة الصحة أو الشوارع ونظافتها ولا النظام واحترام المواعيد ولا الثقافة ودى كارثة لوحدها ده بيقولك الشاب فى أوروبا بيقرا على الأقل 7 مجلات فى الأسبوع وعندنا فى الوطن العربى بسم الله ما شاء الله الشاب من دول بيتفرج على 4 صور حاجة تفرح بصحيح

وده بيفكرنى بظاهرة "وكأنه " اللى اتكلم عنها د/ علاء الأسوانى وهى ببساطه إنه مثلا عندنا مدارس ومدرسين و طلاب وطباشير وكأنه فى تعليم لكن الحقيقة مفيش تعليم وعندنا مستشفيات ودكاترة وعيانين وحقن وأدوية وكأنه فى صحة لكن الحقيقة مفيش وهكذا قيس على كل حاجة

إحنا مفيش فى حيلتنا غير الرغى الناس مش مبطلة كلام لحد دلوقتى ناس متقمعة ومتلمعة عمالة ترغى " وهم امتلاك الحقيقة المطلقة " طالع الواحد من دول فى التليفزيون ده تبع "اختلاف " الثورة او من قوى الثورة أو من الحزب الفلانى اللى أتأسس بعد الثورة وبعدين ولا حاجة ماتعرفش هو جاى ليه ؟ ولا عاوز إيه ؟ وبيتكلم فى إيه ؟

أى كلام فى أى اتجاه ... أنا زهقت والله

كنت بأقول ــ معلش محدش يزعل منى ــ :"قدامنا 100 سنة على ما نبقى بهايم " طبعا الكلام ده قبل الثوة بس دلوقتى تقدر تقول تخطينا مرحلة البهايم دى لسه محدش فاهم حاجة ولا عارف هو عايز ايه !!

يعنى مثلا لو نزلت عندنا فى البلد وسألت أى حد حتدى مين فى انتخابات مجلس الشعب موش حيعرف يرد عليك هو عايز واحد يوظف الواد اللى معاه "دبلون " فى أى حاجه "حكومة " أو يطلعه من القسم لو اتمسك تحرى أو يرجع له رخصة من المرور , طيب سؤال حتدى مين من المرشحين لرئاسة الجمهورية برضه ما يعرفش ده إن كان عارف مين المرشحين أصلا

يعنى انا برضه حفضل أعانى كده على طول وأنا إيه ذنبى إن الناس توى اللى فهمت وعملت ثورة ما أنا كنت عارف إن البلد بايظة وإن دول كلهم حرامية علشان كده أنا مش متفاجئ بكم الفساد اللى ظهر والفلوس اللى اتسرقت

بيقولك فى تقسيم أجيال الثورات :

جيل يعانى : اللى أنا منه

ثم جيل يبنى : اللى هو أنا برضه منه

ثم جيل يجنى الثمار : اللى أنا مش منه

ثم جيل عينه على مجد الأجداد : اللى أنا أكيد مش منه

ماشى وماله كله عشان خاطر مصر ... يا حبيبتى يامصر

بس يا ريت تخلصونا عايزين نعرف راسنا من رجلينا ولا عايزنى أقولك زى ما حد تانى قال : كانت أيام مبارك أحسن من اللى إحنا فيه دلوقتى

وصدقونى اتقالت كتير

الحقيقة أنا أكتر حاجة مخوفانى إننا نحتاج ثورة تانية سنة 2041

يا خوفى عليكى يا مصر